सुभाष वाल्हेकर यांना राज्यस्तरीय गुणवंत पुरस्कार.
न्यूज वार्ता नेटवर्क नसरापूर : (प्रतिनिधी)
महाराष्ट्र राज्य माध्यमिक व उच्च माध्यमिक शाळा मुख्याध्यापक संघाच्या वतीने दिल्या जाणारा जिल्हा पातळीवरील सन २०२१ -२२ चा राज्यस्तरीय गुणवंत आदर्श मुख्याध्यापक पुरस्कार गुंजवणी शिक्षण संस्थेच्या राजे शिवछत्रपती विद्यालय सोंडे माथना वेल्हे येथील मुख्याध्यापक सुभाष आनंदराव वाल्हेकर व त्यांच्या सपत्नीक यांना खासदार 'अमोल कोल्हे यांच्या हस्ते पुरस्कार देऊन सन्मानित करण्यात आले.
महाराष्ट्र राज्य माध्यमिक व उच्च माध्यमिक शाळा मुख्याध्यापक संघ महामंडळ, मुंबई यांच्या वतीने राज्यस्तरीय गुणवंत मुख्याध्यापक पुरस्कार राज्यातील जिल्हापातळीवर देऊन प्रत्येक ४८ पुरस्कार्थीची राज्यातून निवड करण्यात आली. या पुरस्कारासाठी वाल्हेकर यांची पुणे जिल्हा पातळीवर निवड झाली असून, ओझर (ता. जुन्नर) येथे पार पडलेल्या राज्यस्तरीय अधिवेशनामध्ये त्यांना मुख्याध्यापक महामंडळाकडून सन्मानित करण्यात आले.
यावेळी माजी खासदार शिवाजीराव आढळराव पाटील, आमदार सुधीर तांबे, मुख्याध्यापक महामंडळाचे अध्यक्ष जे. के. पाटील, सचिव शांताराम पोखरकर, अधिवेशन अध्यक्ष डॉ. आर. डी. निकम, जिल्हाध्यक्ष हरिश्चंद्र गायकवाड, सचिव सुरेश कोचन, उपाध्यक्ष उपाध्यक्ष मोहोळ, शिवाजीराव किलकिले, अरुण थोरात, गुंजवणी शिक्षण संस्थेचे अध्यक्ष विक्रम खुटवड व सचिव तृप्ती खुटवड उपस्थित होते.
गुंजवणी शिक्षण संस्थेचे अध्यक्ष विक्रम खुटवड यांनी बोलताना सांगितले की, माझ्या संस्थेतील मुख्याध्यापक सुभाष वाल्हेकर यांच शैक्षणिक कामकाज व प्रशासन व्यवस्थापन अतिशय उत्कृष्ट पद्धतीने असून त्यांनी शाळेचा व संस्थेचा नावलौकिक वाढवण्याचे काम केले आहे. माझ्या संस्थेतील मुख्याध्यापकाला हा पुरस्कार मिळाला ,याबाबत मला व संस्थेला आनंद होत असून त्यांच्या पुढील वाटचालीस शुभेच्छा देत आहे.
