केळवडे येथील फार्म हाऊसवर कोरोनाच्या काळात मुला मुलींचा धिंगाणा, पैशाची उधळण,राजगड पोलिसांनी १३ जणांना घेतले ताब्यात.
नसरापूर (प्रतिनिधी)
पुणे-सातारा राष्ट्रीय महामार्गावर केळवडे गावच्या हद्दीत गाउडदरा रहिवासी सुमित सापते यांच्या दुमजली आलिशान फार्म हाऊसवरील बंगल्यामध्ये पैशाची उधळण करत मुलामुलींचा हिडीस ,सैराट डान्स सुरू होता. यावेळी राजगड पोलीस स्टेशन नसरापूर यांनी छाप्यात १३ जणांना ताब्यात घेतले. या सर्वांवर पोलिसांनी गुन्हे दाखल केले आहेत. कोरोना महामारीच्या काळात धिंगाणा घालून पैशाची उधळण करणे हे अतिशय लाजिरवाणे कृत्ये झाल्याची पहिलीच घटना राजगड पोलीस स्टेशनच्या इतिहासात घडली.
राजगड पोलीस स्टेशन ,नसरापूर यांनी दिलेल्या माहितीनुसार, सुमित प्रकाश साप्ते (रा. गाऊडदरा, ता. हवेली) यांच्या मालकीच्या केळवडे येथे असलेल्या दुमजली बंगल्यामध्ये रंगीबेरंगी लाईटचा उजेड करून व मोठ्या आवाजाचा साऊंड लावून मुलं आणि मुली हिडीस नृत्य करीत होत्या. या फार्म हाऊसवर डान्स चालू असून पैशाची मोठ्या प्रमाणावर उधळण सुरू आहे, अशी माहिती पुणे ग्रामीण पोलीस नियंत्रण कक्षाला मिळाली. ही माहिती त्यांनी राजगड पोलीस ठाण्यात कळविली. त्यानंतर शनिवारी (दि. २९) दुपारी सव्वा दोन वाजता राजगड पोलिसांनी या फार्म हाऊसवर छापा टाकला. या छाप्यात सागर रमेश जाधव (वय ३२, रा. खडकवासला कॅनॉल शेजारी, हवेली), सुनील निवृत्ती पाठक (वय ३३, रा. दत्तनगर गणेश मंदिराशेजारी धनकवडी, पुणे), विकी वसंत शेलार (वय २५, रा. केळवडे, ता. भोर), गणेश विजय कदम (वय ३३, रा. पद्मावती मंदिराशेजारी पद्मावती, पुणे), अविनाश संजय साखरकर (वय २४, रा. विश्रांतवाडी घोलप वस्ती गणेश मंदिराजवळ, पुणे), विशाल गणेश पासलकर (वय ३८, रा. निलगिरी कंपाऊंड आंबेगाव पठार, पुणे), सचिन लक्ष्मण शिंदे (वय ३७, रा. धनकवडी पोलीस चौकी शेजारी फाईव्हस्टार सोसायटी पुणे) या मुलांसह पुणे जिल्ह्यातील विविध ठिकाणच्या ५ आणि ठाणे जिल्ह्यातील एका मुलीला ताब्यात घेतले. त्यांची चौकशी करून कोरोना विषाणूचा संसर्ग व प्रादुर्भाव रोखण्यासाठी वेळोवेळी दिलेल्या आदेशाचे व उपाययोजनांचा भंग केला म्हणून त्यांच्यावर राजगड पोलीस ठाण्यात गुन्हा दाखल करण्यात आला आहे.
उपविभागीय पोलिस अधिकारी धनंजय पाटील, विभागाचे पोलिस निरीक्षक संदीप घोरपडे यांच्यासह उपनिरिक्षक श्रीकांत जोशी, हवालदार एस. एन. कार्लेकर, गायकवाड, श्रीमती एस. आर. कुतवळ, अमोल सूर्यवंशी यांच्या पथकाने ही कारवाई केली. तपास पोलीस उपनिरिक्षक श्रीकांत जोशी करत आहेत.
नागरिकांकडून या कृत्याचा होतोय निषेध.
कोरोना विषाणूचा संसर्ग व प्रादुर्भाव रोखण्यासाठी शासन ,पदाधिकारी ,स्वयंसेवी संस्था ,संघटना 24 तास विविध उपाययोजना राबवत आहेत.कोरोना रोग आटोक्यात आणण्यासाठी प्रयत्न करीत आहे. तर दुसरीकडे संस्कृतीला काळिमा फासण्याचे काम तरुण-तरुणीच्या माध्यमातून होताना दिसत आहे. अरे देशात-जगात आता चाललंय काय?आणि तुम्ही करताय काय?यांचे भान हिडीस नृत्य व पैशाची उधळण करणाऱ्या तरुण-तरुणी ठेवले पाहिजे होते. समाजातील सर्व स्तरांतून या कृत्याचा निषेध व्यक्त होताना दिसत आहे.
