भोर तालुक्यातील "सरपंच पदाचे" आरक्षण सोडत, 8 डिसेंबर ला.
भोर (प्रतिनिधी)
भोर तालुक्यातील अनुसूचित क्षेत्रातील ग्रामपंचायती व बिगर अनुसूचित क्षेत्रातील ग्रामपंचायतीमध्ये आरक्षणाची सोडत दि. 8 डिसेंबर 2020 रोजी पंचायत समिती सभागृह येथे सकाळी 11 वाजता आयोजित करण्यात आलेली आहे .तरी भोर तालुक्यातील 155 ग्रामपंचायतीमधील नागरिकांना सुचित करण्यात येते की कोरोना विषाणू संसर्ग विचारात घेऊन गर्दी होणार नाही, अशा संख्येने उपस्थित राहण्याचे आवाहन भोरचे तहसीलदार अजित पाटील यांनी केले आहे.
पुणे जिल्ह्यातील अनुसूचित क्षेत्र व बिगर अनुसूचित क्षेत्र मधील ग्रामपंचायतीतील सरपंचपद अनुसूचित जाती ,अनुसूचित जमाती नागरिकांचा मागास प्रवर्ग व स्त्रियांसाठी आरक्षित करणे बाबत सूचित करण्यात आले आहे.
मुंबई ग्रामपंचायत अधिनियम 1958 मधील कलम 30 व मुंबई ग्रामपंचायत सरपंच निवडणूक नियम 1964 मधील तीन चार पाच व सहा अन्वये शासनाने अनुक्रमे अनुसूचित जाती व जमाती करिता व बिगर अनुसूचित क्षेत्र मधील सरपंचपद अनुसूचित जाती अनुसूचित जमाती नागरिकांचा मागास प्रवर्ग व स्त्रियांसाठी आरक्षित करण्याची तरतूद केलेली आहे. राज्य शासनाने राज्यातील जिल्हानिहाय सरपंचपद अनुसूचित जाती अनुसूचित जमाती नागरिकांचा मागास प्रवर्ग व स्त्रियांसाठी आरक्षित केलेले परिशिष्ट जारी केले आहे. त्यानुसार पुणे जिल्ह्यातील तालुकानिहाय निश्चित करण्यात आलेल्या सरपंच पदाच्या आरक्षणानुसार अनुसूचित क्षेत्रांमधील ग्रामपंचायती व बिगर अनुसूचित क्षेत्रामध्ये ग्रामपंचायतीमध्ये 2020 ते 2025 या कालावधीसाठी ग्रामपंचायत निहाय सरपंच पदाचे आरक्षण जाहीर करणेबाबत कळवले आहे .
